It have ah ting call smart-man and we all know what dat does mean in we parlance. It have all kinda smart-man. It have dem in business, it have dem in polit-tricks, it have dem in de church and it have dem living nex door by you.

De one ting dat dey all have in common is dat dey ent looking out for nobody but dey-self when it come to life. Dey whole business is to mek you do de wuk fuh dem to get de reward. De fact of de matter is dat de real good smart-man does make you feel dat you getting away wid sumtin, when is you doing all de hard work in de fust place.

Curiously it always seem to have a setta smart-man when it come to Cable.
We does have a long association wid Cable allyuh know. It had Cable & Wutless who did use to run telephone and telegram all over de place for years making we feel dat dey love we. Dey did love we so much dat dey even help out de West Indies Cricket jes because dey did love we.

We have Cable Company which running all sort cable all over de place and now giving way all sort ah prize and ting and yuh have to arks is why dey suddenly being so nice to we after all de long years dat dey buss we wid price and service.

It have long, long Cable dat pull all de net full ah flying fish from de Bajan waters into we waters, except for when de fish feel to tek a holiday and gorn back to Bim where dey living in de fust place.

So Cable and Smart-man tie up long time now. So is no surprise when I seeing how de cricket and de SmartChoice work out.

I go mek it short and to de point, if de West Indies Board cyar yet find de balls to lef Lara and he pardners back for de 2nd Test den we ent learn nutten at all, at all, at, all. Is not dat I have anyting against Lara and de res ah dem. De boy could bat and sometimes de res ah dem does chip in too. But de team gorn Guyana and wuk hard. Doh bodder will all de chuppidness of eef Chanders declare early, or eef he ent wuk he field place right and who bowl de wrong line. We all did see a team spirit over the last few days in Guyana dat we ent see in de team for a long, long time.
And it have a simple reason. Dem new fellas have a place to play for and finally dey feel dat dey go get treat right as de professionals dat dey suppose to be. But if de WICBC feel dat dey bong to musta bring back Lara et al den all dey doing is telling de whole region dat hard work ent good enough!

So is when I open my papers and see we Wendy tay-lay-laying fuh TSTT and dey new SmartChoice I had was to say well look at my crosses! Now allyuh doh get mih rong, as allyuh does be quick to jump down mih troat! I does love Wendy like ah love mih own chirren, but I feel she mash a bad vine dey. She now tek up a big sawahtee Eteck wuk where she in charge of all sorta contract and she want to endorse somebody telephone service. Is like de same foolishness again from de cricket. Is how she could be doing ah TSTT wuk and den negotiating wid Digicel nex?

So dey launch dey SmartChoice, but allyuh better watch for de smart-man in dem SmartChoices. I ent no lawyer and I sure it have plenty MBA who could work it out, but watch de fine print in dat business careful! Dey have some maco big picker to ketch you on dat tree!

In case allyuh ent read it I go tell allyuh de fine print. De Smartchoice package does only wuk if yuh calling a nex telephone. So eef yuh calling de Internet is 20 cents every minute. And after yuh use out de minutes dat dey give out in de SmartChoice, yuh paying a nex 20 cents every minute dat yuh talk to yuh neighbour next door, yuh cousin round de corner, and when yuh ordering yuh fry-fowl for delivery.

So what de SmartChoice does do is take away de government approved 23 cents per call charge dat we paying now, but dey not saying dat??

I ent know who gih dem permission to mash up de whole telephone rates but it must be have a nex setta smart-man all between SmartChoice, Criminal & Wutless, and de TATT.

Look, where dem two pitch oil pans and de twine? I setting up mih own smart choice!

:+:+:+:+:+:+:+::+:+:+:+:+:+:+:+:+:+:+:+:+:+:+:+:+:+:+:+:+:+:+:+:+:+:+:+:+:
 

BACKCHAT: Issue 013

ah ha to write yuh and tell yuh what ah gol mine yuh newsletter is to we out here in de desert behin gawd back in New Mexico.
ah love yuh tantie talk column, good to hear bout de new library and yes chile yuh rite - everybody ah talk to in trinidad, all dem tellin meh bout is how bad de crime is so ah was glad yuh did print de lyrics fuh de kaiso.
//Trini in New Mexico


Our beautiful country is now seen internationally as Corruption Capital.
We are on a mission to awaken the Patriots of our Country to help us return her to the glorious state of Sweet T&T, where we can again be proud citizens of a beautiful rainbow Country.
We are asking for the support of our fellow Patriots in protecting the civil, constitutional and democratic rights and liberties of every individual in our society. We hope to provide a forum whereby individuals groups and organizations can enter into a collaborative relationship, partnering with others in the promotion of a common objective. That objective is, a respectable and appreciable quality of Life, Living and Livelihood for all.
//Trinidad