Sometimes we does really have to say tanks and praise tuh de Lord fuh being a Trini. Ah mean de ressa de World have all kinda deep philosophical and meaningful issue to deal wid and we only worry is eef de stocks go run out in de fete.

Now allyuh doh feel dat I mekking joke wid de gun and de drugs and de ole tief we does call politrickians, but somehow dem problems does exist all over de world but dey ent de biggest worries dat people does have.

De whole bag ah Europe long time ago wake up and realise dat we all killing we own planet wid all de ting we putting up in de air. Even Boy George wake up and smell de Hong Wing in he State ah de Union address and finally recognise dat Global Warming here to stay.

Ah see on de news de udder day dat it have people in England paying four hundred pounds to have someone do a carbon audit in dey home. Well we spit out de Mudder Country so long dat yuh know we ent boddering to listen to dem no more.

But it have people all over de 2020 countries who standing up and saying dat dey putting dey money whey de mout is and paying fuh de pollution dat dey mekking on ah individual basis. Dey calling it Carbon Offsets.

Now in a way we doing dat long time. When yuh doing a little renovation on yuh house and yuh buy a new fridge, ent yuh does give de fellas on de block a little $20 to put de ting in de jitney and take it by de Labasse?

So is what tell you dem boys reach dat far and ent jes drop it all in de river? Well dat is de ting wid dis offset business, yuh does pay someone to tek away yuh evils.

Eef only we could pay someone to tek away we National Evils, but I ent know how much dullahs to pay Benny Hinn fuh dat wuk.

De problem here is dat yuh need to not only consider dis offset business, but fix yuh own business from de start, and change yuh habits, so what you doing ent causing no more pollution.

Which does bring we to Chief OhLookASmelter. After de man backpedal at home, he gorn Africa and want to grandcharge and tell dem dat he building smelter and he ready to teach Africa how to be successuful?
Like dem ent teach he not too leave he country when people unhappy, in Africa it does have a rich tradition of Leaders not being able to return home.

If we serious about becoming a developed Nation, we have to think different, we have to change de way we work and play, we have to invent a new Trini!


 

BACKCHAT: Issue 05: Vol 8

Agreed let Christie Ann Morris Alleyne handle it. She's tops in my book and keep the good works coming, love to ready your every word.
//Canada

One more time, Tants:
1. Martin Joseph should be fired!
2. Joan Yuille-Williams should be fired!
.....in that order! Incompetence at its highest!!!!!
//Trinidad & Tobago