It go be interestin' to see if de revised revision of de Traffic Regulations dat put in place fuh de Single 24 Hour Period Acheta Assimilis Lucifers at de Ellipse go work. Allyuh go have to go to yuh dictionary an' thesaurus because me ent able wid no setta lawyer jumpin' on me because I use some word dat de Eye See See decree to be dem own. Not me an' dem at all...as far as I concern dey could take dey Acheta Assimilis Global Goblet (See UU See) Twenty Hundred and Seven an' shove it.

Is when we stop bein' humans wid we own free will an ability to choose? Is since when we need to have somebody tell we what to wear, what to eat an' drink an' jes how we mus enjoy weself at a Single 24 Hour Period Acheta Assimilis Lucifer? Is when dey comin' fuh we fus' born chirren? I done hearin' dem vendors bawlin' dat sales ent good, but hopefully dat was only fuh de Lucifer dey did have up at de Tertiary Educational Institution in St. Augustine de odder day. I ent know what kinda fees dey pay fuh de concessions, but I feel certain dey wasn' cheap.

When yuh hearin' de dotish talk de organisers here talkin' at dis late stage, yuh jes have to wonder how it ever manage to get off de ground at all.
When two weeks or so ago mankind could get on de people TV an' say dat de reason de works on de Ellipse ent complete was because de Gov't have all de skilled mason & carpenter wukkin' on dey project I had was to shake mih head in wonderment...is 'bout six years at least dat dey know dey havin' de Acheta Assimilis Global Goblet in de region, an' is not yesterday dat de Gov't suddenly decide to build dey complex dong on de Port, so is why Mr. Super_Efficient_Private_Enterprise only now realise dat?

Is how come nobody didn' open dey mouth an' insist dat de Tsunami Shelter in Tarouba get finish on time? If dey wasn' lookin' out fuh deyself to get dey own place (de Ellipse) fixup dey coulda be holdin' all de Lucifers at de Tsunami Shelter an' dey wouldn' have to have no headache wid Traffic Regulations. About de best an' onliest hope dey have fuh no macco setta confufflement unfortunately is if nobody turn up fuh de Lucifers at de Ellipse. What it is nobody seem to realise is dat in POS, while it have plenty road runnin 'parallel', dey does all eventually endup in de same point an' de resultin' bottleneck does backup a loooong way.

But then again, maybe dey onto someting here...if de name of de game is sell to de highest bidder, why dey doh jes hold ah auction fuh Official Sponsor... an' change de country name to Republic of <Sponsor's name> Trinidad & Tobago fuh a year or two? It more feasible than SmelterVille Sur Mare an' a whole lot less damagin' to de environment...


 

BACKCHAT: Issue 10

Dis worl' cup talk have mi real bazodee. Firs' since ah does like to get me info firs han ah decide to check out de cricket world cup.com site. Nice site. Plenty info. But de official site is from indya.com who offering mih a place in de commentary box. But ah ent take dem up on dat yet.

Dey say dat is de official site so it suppose to have everything worl' cup.
Ent? Well tants gyul, yuh know dey eh even have a li'l form where ah cou'd keep de scores as we go along. Ah mean to say, ent de odder worl' cup (futball) did have dat? Now it have a shedule of de matches so ah suppose ah could mark up on dat. But dat int the same thing, tants.

Then ah try to find out de rules for deciding who playin' who after the group stage. Well, tants, dey know how we bright, so we could figure dat out weself. But I is a boss on de internet so ah fine de info somewhere else.

So ah decide ah better sen' dem ah e-mail bout all dis dotishness . Wayoe!
Like dem in know bout e-mail . Not ah e-mail address or phone numba. So dey doesn' want nobody to ask dem nuttin or wot?

Nex, a try TV6 to fine out what matches dey showin'. A talk to a nice lady in de program manager office who tell mih dat she cyan give out dat information over the phone, and dat she cyan fax mih a shed-dool either. Ah have to check de newspapers every week for dat weeks matches. So, tantie, how me an mih padnuhs go set up we limes, eh? And how we go know when to tell Carib to deliver another truckload a beers. Yuh ent see dem TV people real racial. If was ah set a foreigners dey wont'a spoil we lime so.
//Trinidad


Millions of my dollars have been spent to go before the Privy Council to be able to lay criminal charges against the Chief Justice and now the case is stopped because the Chief Magistrate changed his mind about testifying.
I say fire the Chief Magistrate, charge him for contempt of court and make him bear the cost which was being carried by taxpayers. Then still set up an (INDEPENDENT) inquiry to find out what cocoa he has in the sun.
This judiciary is like a rotten fish and the stench is getting unbearable.

Why does this administration find it so hard to do the right thing? God help this nation!
//Trinidad