Is why de questions does never get answer? Ah mean is trute dat we is ah 9 days wonder country.

I sitting home watching mih TV like everybody else who interested in de cricket and I noticing dat de Oval empty like de heads ah some ah dem politrickians.

And doh try and tell me dat is because is de ticket dem expensive or dat it ent have no support for de minnows. It have to have more reason fuh dis ting.

Eider everybody hiding behind de cameraman did call in and tek ah sick or dey all dey wid dey deputy hiding up in dem skybox. But all I seeing is empty seat after empty seat.

So is why dey not going? Yuh feel all de tantana about getting de tickets in de fuss place chase away some people? Dem ICC people does want yuh to mark all yuh gentleman friend on a piece ah paper before yuh could get a ticket.

And doh let dem want to tell yuh how to dress and ting..chuts!

Well I ent know de reason but I feel it all add up.

But dat is answers and not questions. And is all dem question dat we only storing up like we feel dat dey go save we when de oil and gas run out.

Leh we go back to de cricket. Allyuh remember how Boynes and Manning did try to confuffle we wid dey nanci stories about how dey didn't want to compete wid we Caribbean brothers and sisters, and how de Brown Package was all dat we did want, and how we standing ready to tek up de slack eef we get call. I ent know who dey feel dey was fooling but we all know what dey was saying. Dey cut a deal wid Bim to get dey vote for Free Trade Headquarters. Except Bim did long time figure out dat dat FTAA ting was dead in de water like Tobago flying fish.

So after all de ole talk done and Boynes and Co. say dat dey buidling Cricket Stadium in Tarouba dat never did finish in time, so is de Oval dey had was to go like we did all know in de fust place..de question dat dey ent answer is. Why yuh build a nex O'Halloran racetrack?

Is like we all forget dat already because we know it was never going to happen. But is $700 million dullahs dat get spend on a useless stadium dat no-one ever reach. Why no-one ent asking where de money gone?

De Chief Magistrate lacaray and run he mout on de CJ, but when time come fuh he to put up or shut up, he like he tun into a semp. So now all kinda ole talk passing dat I ent have no court clothes for. Because yuh dun know dat when dey haul you or me in front of de same Magistrate we cyar say ..well boss, I really ent feel to talk now yuh know.

So eef de DPP want to spend more millions to go and have a lime in de UK and visit de Privy Council based on de testimony of ah witness who now ent talking yuh have to ask again who mek dat call? Because no-one does seem to ever get fire for getting it wrong.

Is how much time yuh does hear dat de DPP run Abu into court and de starboy witness turn out to be ahem 'less than truteful'. Yuh ent feel dat de DPP and dem boys have to ask deyself who sending dem dese wutless witness? And is not like dey ent know how to figure it out. Law and Order on TV everynight now bout six, seven times.

Is like we need a big blackboard down in Woodford Square. On one side we could put all de questions dat raise fuh de Year. And on de next side we could put a big tick fuh when dey answer, so at de end of de FIVE YEARS we could see a simple score and decide wedder de Team right or not to continue to represent we.

I watch dat likkle Bermuda boy cry he eyes out Monday moring in de Oval and I say bless he heart, because he doing a ting to mek he whole country proud. I cyar say de same about de side dat playing fuh Trinidad & Tobago now and yuh know I do mean de cricket side!
 

BACKCHAT: Issue 08: Vol 11

Well yuh score today! Tants.

Ah still laffin’. But watch yuh pressure and doh bus yuh bloomas nah.

I gorn from here again. Cyah tek the mess, the stench ah de politiks, and de brazen wastin’ of riches in dis place.

I doh tink God here anymore nah, he dun leave it to de devils and dem…wuh yuh say de Lucifferis etc?

And nex, de udder ting, wuh yuh mene “Acheta Assimilis Global Goblet”
is Chutz Assinine Glow Balls gobbldigluck yuh mean! Right?--- I orf
on de Bwee plane. Awrite, doh tell me is Cari etc. Yuh know when yuh
call BAA (British Airports Authority) fuh de plane news dey duz call it Caribbean Airways. Like nobody tell dem de coreck title. An a nex ting, yuh cud only buk a flight between 9 – 5 week day so eef yuh feel like busin outta de cole to WIndies on a weeken, yuh jus have to go to de airport and tek yuh chance dat deres a flight available. Real chuppid.
De udder nex real ting is yuh cud go orn line to see de flite dem, buh yuh cyar pay fur de ticket . Yuh still hav to go to de orffice to pay.
Diz new ole airline full a – sorree ah doh kno no cuss word bad enuf.
A gorn fuh real dis time. Enjoy the secun rate cricket and pray fur
a Happy Holy Easter when it cum. Take it easy on de green stuff dey promotin for Sin PattriK day. Yuh tink he go take dat as HE OWN DAY TOO?

Trini on de loose.

/Trinidad & Tobago