Allyuh lissen good. We out de World Cup! Ah know dat it go come as a big surprise to many ah we, because we did never get een de grounds to watch de game in de fuss place.

And ah know how it have ah whole bag ah allyuh who go say ' ah tell yuh dat Lara gone tru' or 'how Ganga ent get pick?' or any number ah reason why we poopsing on de field.

But de sad fact is dat dem ah we dat had eyes to see did long know dat we wasn't going nowhere fuh years and dat Ken Gordon and he buddies ent show me dat dey change de khaki pants yet.

Now is true dat Dehring and he marketing boys does talk nice and all kinda back pedalling happening now, and ah not talking about Flintoff on de pedalo.

De irony is dat Boynes and he side could stand up and watch we in we face and say ah boy, yuh ent see we was right to tek de Brown stuff from in front?

Is dat kinda foolish tinking dat does keep we where we is. Is ah setta deflection dat dem boys playing like is scooch in de schoolyard. Doh mind dat is ninety-tree million dullahs ah we dinero dat dey spend on de paper duh de Brown ting. And doh mind dat we ent see nobody reach in town fuh de game and we ent see no setta donzai spending, but we ent have no embarassment like dem small island.

But we have a half finish stadium in Tarouba dat looking like it go be a nex Caroni race track already.

But we like it so, we like de bachannal and de mauvais langue. We doh demand no respeck from we politrickians but dem want to play social wid we. Imagine dat Patos want to say dat he ent feel dat Trini could handle two elections in one year. Is why we cyar have dem all on de same day?
Eeef George Bush could figure out how to vote fuh President, Senator, Mayor, and dog-catcher all on de same day yuh ent feel Patos could do de same?

And is not like it have no big setta voting to happen. Is only 82 candidates because yuh don knowis eider yuh vote PNM or yuh vote a nex way. We history doh have no three way race. So run all de ting on de same day. Eider we sweep dem all out or we put dem all back. Same khahki pants.

Anyway like I did say is de people who does really run de show in de end, it might tek a while but dem politrickians eventually have to humble deyslef and see how we does real want de ting. Dey does try to say dat is dey idea, and we does let dem tink dat, but we does really know who dey is.

Is jes like de cricket, when all de ole talk done, dey had was to open de gate and let people in wid dey food and grog, dey conch shell and bottle and spoon, and Freeco to boot!

Umpire! Howzat!??