|
OK, so de
preacher daughter an' de soca stars bacchanal done run de 10 day
course an' Trini lookin' out fuh de nex kerfuffle...I wonder if dem
racin' pool does give odds on dem ting like dey does do in England?
Lemme see, who go be de star of de nex to-do... which politrickian
yuh bettin' on? Or which priest/pastor/pundit/imam go mek de grade?
Or maybe we go jes have to settle fuh a plain 'celebrity' a la Paris
Hilton dis time around.
Is because we so like gaudy an' flash dat anybody an' anyting does
pass muster in dis land, an de more meretricious de merrier. A man
only have to start runnin' freeness an' everybody is he fren...dey
ent know him from Adam, but if he have de bling we in tings. Is how
many people in dis land did have to lay low when Dennis Davidson did
get in a totally different kinda spotlight than de flash-de-cash,
'high' society one? I always say dat if hypocrisy was in de Olympics
Trini rulin' de roost. When yuh could read in de papers bout de
preacher son (who did stand valiantly by he sister side like a
dutiful brother an' defend her honour) sayin' he was glad to see dat
Verizon did drop dey sponsorship of Akon but at de same time
apparently doh have no problem patronising de nightclub dat allow he
underage sister inside, yuh has to wonder jes what kinda moral
values dat family really raise wid:
When Alleyne spoke to the Guardian yesterday, he said he was
preparing to go to Zen for drinks with some friends from abroad.
Saturday Guardian 5th May 2007
http://www.guardian.co.tt/archives/2007-05-05/news9.html
Everybody an' dey nennen does be lamentin' an' wailin' dong de place
wid de way laws does get break free sheet in T&T, but when it suit
dem, dey self go falsify customs declarations or park dey car
anywhere or tell de policeman dey didn' see de No Entry sign an' how
it mus be only went up yesterday because is every day dey passin'
dere an' dey woulda bong to see de sign if it was dere. Even wid all
de talk dat pass 'bout CWC 2007, yuh know is only because we vex we
wasn' de ones who did have de cushy job playin' up wid we de people
money. But de height of de hypocrisy have to be all de fuss over
Lara. Suddenly he have all kinda close fren who uesd was to carry he
bat fuh him since he small...is where all dem so-call fren did use
to be when de bwoy mudder was sick an' he couldn' concentrate on he
game? I hope he remember de sayin' de ole people had - dat fren who
encourage yuh to buy big belly horse in de rainy season doh help yuh
cut grass in de dry season.
Anybody really give a damn 'bout de Soca Warriors or football in T&T
in trute?
We was all hot an' sweaty when dey was in Germany spennin' money lef'
right an'
centre on all kinda contest an' competition to see if we coulda mek
de lime Germany too. But, BUT, now dat de mark buss an' de bwoys
wonderin' where all de money went is how many of dem lookin' to see
if dey have even a 25 cents spare fuh dem? It go be most interesting
to see exactly how much did get spend on what fuh Germany 2006...I
hear a talk dat plenty executive an' dey spouses did get free trip
includin' accomodation an' tickets an' 'extras' from a certain
company dat love to spend big money on PR but apparently not so much
on ensurin' dey customers get de service dey payin' for.
An' de saga continues, de U-17 team barely scrape through an'
qualify fuh Korea, de WICB...is what yuh could say 'bout dem dat
could maybe pass as charitable wid a good push? (I glad to see de
Bajan Gov't take in front an' sayin' dey want dey gate money from de
WICB...is to hope de resta de Gov'ts follow suit.) What yuh feel is
de chances dat de tour of England go run off smooth wid no
bacchanal? An' then yuh have de politrickians...all man jack warmin'
up dey rhetoric an' shoppin' fuh speech full of magniloquence to
drop on de poor punters who cyant even be sure to get rum an' roti
dese days.
After all said an' done, yuh feel ANY of dem does really sleep good
at night?
Is a good ting so many of dem ent no spring chicken to boot, because
I ent see how none ah dem coulda face dey mothers an' wish she a
Happy Mother's day...
Allyuh do someting nice fuh yuh mother...not jes on de one day, but
on each an' every one of de odder 364 in every year.
|
|
|
