Is do be enough to mek me want to hold mih head and bawl yes! I ent talking about de heat dat we getting on we head everyday. Is de lack ah humility dat have mih so frustrated.

Yuh know how long years ago people did use to say dat how we was de nicest people it have in de world. Even Desmond Tutu come and bless we all and call we a Rainbow People. And is now I feel dat what he did mean was nutten to do wid colour. It was dat after all he live tru dat he find a place where everyone living nice togedder.

To he dat was de rainbow after de storm dat South Africa was to he.

But somehow we all tun leggo beast and we ent care bout nutten and nobody no more.

And yuh know we does all feel dat is some kinda new tig dat jes reach and we have plenty people to blame. It have dem who want to blame de PNM and dem who want to blame de UNC, and all de ressa dem party. If have dem who blame de Businessman and de poor man. It have dem who blaming all dem single Mudder and absentee fadda.

But it have a point where it jes doh matter who pass before and who do what. No matter who you is and what yuh stage yuh reach in life yuh does have to standup and take some responsibilty fuh yuh own life and behaviour.

So is when I read dat Rowley could sue de Integrity Commission fuh damage to he character I does have to wonder if de inmates running St Anns or not.

I really ent care eef wha town say true or not. Dat is not de issue.
Rowley win he case on a technicality. Dat is time to say tanks and give praise to yuh Lord and find a way to help chirren like Danah.

But when de Commission self get slap up by de Courts yuh have to ask yuhself why dem so does even bodder to continue de wuk. If is was me I done fire dat wuk long time. Ah mean yuh want to mamaguy me and den make a pappyshow ah de whole Commission and yuh expect me to continue to skin and grin?

In de same way is when de Press going to stop printing stories wid some yuteman mudder weeping and wailing about how 'he is a good boy' and he never do nobody no trouble. Ah mean I sorry but I jes doh feel dat anyone who have a nickname like 'Satan' and 'Bull Pistle' ent mix up in someting dat ent right.

I de fuss to say dat ah man innocent until proven guilty, but dese boys like dey hustling to prove dey guilt. I remember dat we all use to have name fuh all we pardnah. But we uses to call mankind ting like 'Reds'
and 'Sancho' and 'Bighead' or 'Smitty'. Dem was name dat make sense.

But times like dey change and dem does tell me dat I ent moving wid de times. But allyuh doh forget dat after one time is two...
 

BACKCHAT: Volume 008 Issue 19

Salut ma Tante!
There is so much in that last issue that is not very clear to an ex-pat
but symptomatic enough of Politicos and their sycophants worldover that
one can only shake a head and see that TnT is world-class in political
stupidity and idiosyncrasy.At the moment with the Queen of England in
the US and Bushie on his best behaviour while on the other side of the
globe al-Qu'aeda does its thing one finds oneself having difficulty to
differenciate as to which disaster to concentrate on for any length of time.
So keep on trucking!
//Canada