Well de rain like it reach in trute and like it wash out all de tings dat ah did had in mind. Dat have to be a good ting because it have so much dat deserve to try and forget and pretend dat it ent happen here.

Ah mean ah know dat all over de world it have all kinda bachannal but somehow when ting does happen in dis little Trinidad and Tobago it does seem to be bigger dan anywhere else.

Ah mean how big men like de Chief Justice and de Chief Magistrate could be playing tit-for-tat like dey still in shortpants in de schoolyard? If we cyar look to dem fellas for some decorum and respect. But is like we jes cyar find no heroes.

And when we have heroes we doh seem to know what to do wid dem. So we does turn dem into some kinda pappyshow.

Imagine dat de Soca Warriors still trying to get a fair share of de FIFA dullahs from de World Cup. Dem boys have to go to court to even get a chance to see de books. And yuh done know dat when dey see dem books it go have even more ole talk about how de books write up.

Doh mind what people want to say about Brian Lara but yuh cyar deny how much runs he score. It doh matter if he play as Captain or not, but we do de same ting in reverse to him. De politrickians rush to shake he hand and give he gifts but none ah dem gifts help Lara in he life or he development.

We rush to throw fete for everyone who show a little talent on de World Stage. But like de moment we realise dat de best ah dem does be in de ting fuh de long run and need we support when dey lorse too.

So we does enter de continous cycle of we best and brightest have to pack up and go furrin to get de support fuh dey talents. All de while we jes putting on a nex coat ah paint on de country.

De government put up some pretty, pretty pictures round de Savannah showing all kninda Arts Centre and Carnival Centre, but yuh know how it go get look after. Jes pass by de Hasely Crawford and see how de roof peeling back and de flag shredding.

But dat is how we living now. We doh need to take care of nutten no more, Tings bound to fix in de future...somehow.

So all de while we have Heroes dat doh get no recognition. It have Teachers who does go to school everyday. Dey does try hard to teach chirren who parents tell dem dat dey do need to wuk.

It have Police who does try to help children everyday. Dem is de children who feel dat dey ent have no future in dis world. Dem is de ones who does snap and kill all de classmates.

Well yuh get de idea. De real heroes we need to look up to is we neighbours who does call out when dey see someone strange in de road.
Dem is de ones who does make de world work. And de sooner we start to rely on we neighbours de better we country go be!


 

 

BACKCHAT: Issue 25 Vol 8

Happy Labour Day,

Nah man Tants…sorry ah mean nah girl Tants, I doh believe you….you tink all dem nice functional ideas to ease the traffic problems go happen widout tiefing????

You mean to tell meh dat at no point in writing we, de thought ain’t cross yuh mind that dem suggestions is new ways for Trini-kind to tief?

How much business men it have collecting VAT and not passing it over to the Gov’t?

Ah not saying that the toll/tax whatever it be called to try to promote less vehicles will not have a positive effect….but tell me de trute yuh really tink the monies collected go end up in the Gov’t coffers for improvement in the different areas yuh suggested……Is not Tony Blair running T&T yuh know is different level and category of ole tief.

Remember all de Health surcharge was supposed to do?

Look Tants, stop dreaming nah…….Earth to Tants ……Triinbago to Tants…yuh get up yet?

Still loving you from Canada

//Canada