Fuss to begin ah want to big up and shout out wid much respeck Queen Maccomeh of Commess University fuh de words dat ah did share wid allyuh lass week. So allyuh could visit http://www.commessuniversity.com/ and hail out de Queen and doh forget to represent!

Well dat is how de yute and dem does talk nowadays. Sometimes I does find it hard to follow what mih grands does be saying. All kinda words dat I know dey not saying in front ah de Tantie and de ressa de neighbours.

And dat is de ting today, like we loss respect for de elders. Doh feel dat I saying dat chirren boun' to mus feel dat every Auntie and Uncle have to be respected jes because dey older. It have dem people who really ent deserve no respect from any chirren in de fuss place. But I still expect chirren to treat all dey elders wid tolerance.

It plenty easier to say 'a pleasant Good morning' when yuh see de neighbourhood coker on de street dan to bawl out 'Mash'! Because it ent serving no purpose to create all dat bachannal in anybody life.

But I straying in trute. I pick up mih Gazette de odder day and find a story from Jamaica about how Criminal and Wutless give a man Free Internet access for de ress ah he life. Well papa I say dat sounding like someting I could do wid, so I read on to see how he come to be so lucky.

Well is den I realise how is trute dat how dey does give wid one hand and tek way wid de nex. De man is One Hundred and One years old. Now doh get me wrong on dis one. I ent jealousing de man and I ent saying dat how dey was wrong to gih de man de freeco. But is who does really come up wid dese ideas dat cyar sit down and realise dat dey ent ting it out at all.

Well yuh done know dat is only minutes after dey finish tekking photo fuh de papers dat C&W ducking and running from de questions dat bong to aks. Ah mean is what ah was saying about respect. Some bright young MBA mus be well sit dong in ah meeting and say dat we could gih de old man a freeness and get plenty picture in de paper. Nuttin wrong wid dat but obviously de MBA ent figure out dat yuh cyar get nutting free.

So when C&W tekking de man picture dey also tekking some ah he dignity.
Is den dat to answer de reporters de head of Corporate Communications at C&W Jamaica say ""The fact is that we just heard about it. If we had heard of a 95-year-old doing that kind of thing we would have done the same,"

Oh gorm...yuh mean to tell me dat wid all de book learning dat dem people have not one ah dem read to not insert yuh washekong in yuh mout?

Instead of giving de man Internet fuh de ressa he life why dey didn't just give he back all de money he spend in de last five years? Simple easy and showing de right image. But dem ent ask me nutten as usual.

Anyway ah gorn to see eef ah could get some Free Internet before ah reach one hundred!


 

BACKCHAT: Volume 8: Issue 27

Tantie,

re: See Nen Nen News by Queen Macoomeh

Tantie dearest, ah know what yuh mean about de "accident" when yuh read
de Queen story eh? I mehself is a regiller reader of de Queen columm and
ah get so accustom now, ah does prepare mehself before ah read. Ah does
wear orn meh Depends, and haul orn a bib too, eef ah drinkin meh tea or
cawfee, becaw it sure to come troo meh nose and stain up meh bodice
when ah buss out a laugh....yuh hatta make sure yuh by yuhself too, doh
be readin in public becaw folks go surely say yuh head gawn...

yuh could akse de Queen if she have a publication? Ah is a big fan! Ah
would love to see plenty more.

Trini in Toronto.
//Canada

Man! Tantie Talk sweet too bad dis week, man!
//Trinidad & Tobago

Salut ma Tante!
I think that your article on the fate of the four local terrorists
(TnT-style ) is absolutely fabulous.
Most of my friends assumed that some spooks in the US government
overheard our guys indulging in some trash talk (caribbean-style) and
assumed that they were hearing a plot of some sort.
It could be that they were being taken for a ride and without access to
the appropriate dictionary they involved HomeLands Security or some
other sort of US hocus-pocus.Whichever way you slice it The Excited
States of Amnesia can always be depended upon for a good laugh.
Cheers!
//Canada