Is when was de las' time yuh did eat a yard fowl? Dem ting real different from what yuh does get in de grocery in trute. I feel dat yard fowl have at least 2-3 time more bone in dey body than dem ting in de supermarket.
If anyting happen to de poultry industry an' we have to 'fall back' on common or garden yard fowl, de fus' casualty go be boneless chicken roti.

Allyuh feel I jokin' but jes de odder day mih macomere did bring me a yard fowl, an' if I didn' know is she self raise de ting I woulda swear is some kinda corbeau or jailbird when I did start to fix it up fuh cookin'...is fus de ting hard. If we Soca warriors did have muscle an' bone like yard fowl all now so T&T is de defendin' champions of World Cup Germany 2006!

Yuh could wearout a pressure cooker tryin' to cook dong yard fowl, de ting so hard. People does try all kinda addition to try an' sorfen it. It have some people does swear by Coca Cola, some does tell yuh to drop a nutmeg in de pot an' then a nex' set go tell yuh dat cookin it dong in red wine is de onliest way to get yard fowl sorf enough to eat. All dem might be right if yuh have enough time an' an' nobody ent watchin' yuh cuteye every time dey belly grumble, but de best an' fastest way is to cut up a green pawpaw in de pot. Yuh does not only get yuh fowl cookup nice an' sorf, but yuh also have de pawpaw dat soak up all de flavour to boot, anybody would swear is some christophene yuh have in de pot.

How come we doh have nobody sellin' "free range" chicken in a big way in T&T? Maybe I jes doesn' get out de house enough, but I fairly sure it ent have no halfway decent size free range chicken farm in operation anywhere in T&T. Is not yard fowl necessarily dat have to be raised, even de ordinary battery chicken bong to mus' thrive if it runnin' in de sun whole day eatin' real food instead of bein' jam up in a cage gettin' pump wid steroids an' all kinda 'medicines' dat wouldn' be needed if dey wasn'
livin' under such distressing conditions in de fus place.

Why it is we payin' nearly $28 per kilo fuh chicken dat have almost no taste except fuh de 'medicines' dey been injected wid even before dey did leave de shell? If yuh have to pay dem kinda price at least let it be fuh someting dat yuh know worth it. We in T&T have to learn dat votin' ent only someting yuh does do once every 5 years, every day umpteen times a day we make choices, but jes like de once-every-5-years choices, is how much serious thought an' careful consideration we actually give before we make de choices?