Is when we people go wake up and lissen when big people talking? Chuts man! I dos get blastid vex sometimes yes!

Ah mean to say we celevrating we forty-tree Years ah Independence dis week and like we still cyar recognise dat we could stand up and run tings we self properly. Like we still cyar let we people run de ting.

We only pulling down we leaders when dey trying dey best to help we develop, is like we still feel dat unless de talk come from de Mudder Country we cyar follow nutten.

Finally we in charge ah we own destiny and we only quarelling about who go save we, and even eef we accept a Leader we ent want to hear what dey have to say.

Dis week when Patos look like he finally ready to announce de big Election Party it have too much griping and complaining from all de sides ah de society. I ent know what it is people want in trute. Like dey ent realise day Fadda Patos only want to see he chirren ( and I including he son too) do well and prosper.

Patos give up of heself all dese long years to serve we in de Parliament. He getting ready fuh de Big Election Fete and he already showering WE wid de gifts. He ent waiting fuh nutten from we. I done get a raise fuh de Ole Age from de Government and Mavis hard back twenty-four year old son tell me dat de Pusher man on de block say dat as de CEPEP only get ah 15% increase he raising prices 10%. Now dat is what yuh does clal selflessness in trute!

Yuh cyar feel a how about dem Civil Servants getting a liitle lagniappe because it have some confufflement about de pension getting pay. Ah mean to say is Years dat dem fellas did toil in de Government wuk to fix up nice fuh we and dey does deserve de same level of kindness.

Jason who does drive maxi tell me dat he glad fuh so dat he cyar use no cellphone when he driving no more. He fine dat he was having real trouble handling he business on de road. Ah mean is how much han' yuh need to count de dullahs, blow de horm, sup a cold beer, and feel up de school-gyul while overtekking mankind on de shoulder?

And doh talk about how lucky dem gyul selling cloth on Charlotte Street does feel. Is a whole extra dullah ah hour dey getting, now dey could finally afford to have de hops bread dey been dreaming dey baby-fadder go buy fuh dem.

So when I read how people feel dat Patos and de boys trying to buy votes I does get real hot up yes.

I best go and make some shining gush tea to calm mihself. But before ah go is one last ting ah has to get off mih chest. Yuh know dat nice Mr Narace who was organising de little dinner fuh Patos. Well I find how all dem Media rough him up bad, bad, bad.

Ah mean to say de man was simply organisig a symbolic event to dramatise how de price of a two-piece and fries out ah de reach of de ordinary man. Is not dat dey was trying to dig out nobody eye, is to help we dat dey was havinf de ting.

Ah mean to say yuh hear anyone complain when dem Society people does go and pay dey hundreds ah dullahs fuh a bowl ah soup and ah glass ah water in de Poor Man Dinner? Chuts...is when we go see dat de PNM is de Greatest and we go all prevail!

ah gorn..de kettle boiling!