weepah, I tired in trute yes. Dis Republic Day ah went on a excursion wid de ressa de side from de church group. I jes rush back in and I ent even finish unpack yet.

We went Manzanilla and ah fill ah bucket wid chip-chip. Ah still have to go and clean it all yes. Yuh know long time yuh use to come back wid fish and chip-chip and coconut. Well now is even more yuh coming back because we tek de chance to do a beach cleanup and bring back like a small Labasse wid ting dat we people does thrown on de beach and in de river.

Ah mean to say is why we people nasty so? De amount of plastic bottle and plate we find is like we could open we own barbeque place and not have to buy any plate at all.

Is why we people jes cyar get de idea dat dey cyar trow dey rubbish in de street? I ent know when we go change.

But de ting I was really trying to figure out was dis whole Republic ting. I ent mean de Bank. I mean de Country is ah Republic so we does no longer have no Queen as Head of State. Instead we have ah President.

But is not like it mek any difference to you and me, I still waiting for someone to explain it to me. Eeef allyuh have a good explanation tell me nuh.

De ting is dat eef yuh break de word down it have two part. One part is Public - well dat simple, dat is you and me. De next part is Re - well dat does go in front of tings dat we want to do a nex time, yuh know like REpeat, REdo, REoccur, REstate, REstore...yuh get de idea.

So I feel dat dis REpublic does mean we get a chance to REstart we stories, but we jes doh seem to tek de chance. So right now it have all kinda people who dancing up and saying dat Patos and de PNM days numbered. It almost starting to soung like de days of de NAR before dey mash-up de PNM.

But doh forget wha happen after dat happen - we did vote de PNM right back in again.

Because de tings dat we people jes ent ready for is to REmake deyself.
When de NAR did standup and say dat we all have to wuk and save, and obey de laws de Nation did reject dat.

No matter who win, dey still have to deal wid Civil Servant salaries, hospitals, roads, jobs, gasoline subsidies, TTEC rates, water rates, food prices, pollution, and all de udder tings dat we have to deal wid when de oil run out!

So when Pstos ready to stop all de mamaguy and call de Election all ah we have to REalise dat de time running out fuh we to continue living de way de doing it. And it starting wid some basic tings, we have to stop trowing garbage in de streets, we have to drive like we REsponsible, and we have to REcognise dat is all ah we dat does mek up de PUBLIC dat does mek up de REPUBLIC and eef we do REmember dat we all better know dat crapaud smoke we pipe.