So, Silly Season 2007 comin' to a close an' before yuh know it go be all over an' yuh have de nex' few years to wonder at de choice yuh did make.
I makin' dis one short an' hopefully 'sweet' so dat yuh have as much time as possible to clear yuh head, relax an' think long an' hard 'bout what yuh go be doin' come Monday 5th.

Earlier dis week I was most pleasantly surprised to see a full page ad in de papers dat did ask Trini to forget 'bout leader an' party when dey reach to make dey mark on de ballot paper, an' jes choose de candidate who dey feel could make a real difference.

I cyant remember who it was place de ad, but I hope Trini take it on an'
decide to show de world dat we ready to face de 21st century as responsible citizens of de 'global village' who unnerstan' what it mean to have a true vision of de future we want fuh we families.

It truly amazin' dat wid 2 weeks to go to de elections, not one party able to come up wid a manifesto yet...not even de rulin' party dat supposedly had de advantage of knowin' when de election date was before everybody else. Yuh have to wonder if dey writin' dem wid a quill an' ink!

If de man or woman dat best fuh de job not from de party yuh like dat is who yuh should vote for. Let yuh conscience an' common sense be yuh guide, because is only one chance yuh have to get it right.