I ent know what wuss, lining up in de Airport waiting fuh a place to carry me Tobago or sitting in de maxi stuck in traffic waiting to get to de Port to buy a ferry ticket.

Is like everyting is a lineup nowadays. Mih nephew only telling me how I should be using all dem fancy Internet Banking and bill payment business but I still does like to know where mih money is.

So I does pay mih bills in de people dem office and line up dey too. At least ah does have mih receipt from where ah pay de ting. Dem Bank want all ah we to switch to dem fancy online system and payment business.

But when yuh really sit down and look at how dem ting does wuk is like all ah dem is jes a nex chance fuh dem to mek a dullah on we.

Explain to me how all dis fancy hi-tech business dem Banks have does still mean dat yuh have to wait days fuh yuh money to reach in de account. Ah mean dey does tell yuh frankomen dat when yuh pay yuh light bill using de Internet yuh have to allow some days fuh de money to clear.

But eef de Bank have yuh money in de Bank, and is de same Bank dat running de Internet Bank, why dey cyar mek de transfer immediate?

I real missing sumtin here. Ah mean to say when yuh go in Chin shop and pay for yuh little groceries wid yuh Linx card ent de money does come out yuh account faster dan Chin say he doh doh laundry.

All I hearing is how tings go happen soon come. Dat is how all de politrickians does talk - promise dis, promise dat but none ah dem ever go come tru.

It have all kinda promise I hearing, free laptop, half-price laptop, nex one ah dem go be promising to pay yuh to tek a laptop. Is like dey tun de ting into some kinda of auction.

Maybe we should have Internet voting, dat way we ent go have no more lineup, except some joker go want to say dat de winner hack into de system and fix up de business.

Is like we bess stay wid de lineup yes!