Well, well, well...what a ting. Silly Season come an' gone an' we back to de same ole, same ole...except dat Dooks ent get even a onesie in de ting, but he did show serious class in acceptin' de voter's decision. I wish dat I coulda say de same fuh Patos an' Bas, but dem is a different breed apart.

It good to see so many females in de politricks, an' wid a lotta hard wuk on dey part an' plenty luck dey might jes be able to make it politics once more.
If Patos feel he could skin he teeth an' get dat setta women he make Ministers to jes do what he want instead of what dey feel is de right ting to do, he in fuh a seriously 'fun' time over de nex' few years.

But then again wid Christmas nearly here an' Carnival soon to come, it ent go be too long before de masses forget 'bout campaign promises an' get back to dey madding ways but dis time wid parang, pork an' pan instead of philippics invective an' vituperation. All Trini could see is de price of oil aimin' fuh US$100 an' de las budget was based on oil at US$45, so tings lookin'
nice too
bad. Is only when dey chile bawlin' from hunger an' dey have to go lineup in de government hospital & health centre to treat de malnutrition dat dey go wonder where all de money goin'...goin'...gone...

I waitin' to see how tings play out over de nex few months, a couple of de ministers dat get appoint look real interestin'...is to be hope dey actually have ideas an' de will to do what is right an' necessary fuh de nation. As fuh Dooks an' de CoP, dey halfway to enlightenment, because until yuh been down yuh cyant pick yuhself up. Hopefully de excess baggage dey carryin'
dat de masses viewin' as a UNC-Has Been-C Team will go dey way an' let de true CoP people go 'bout dey work unfettered. If T&T did had proportional representation, dey woulda had some seats in de parliament, all things considered dey ent do too bad fuh a first time.

So, Rum & Roti time done, an' is a totally different setta party dat go be occupying people from now on. Paramin & Lopinot is where de masses go be until de nex' dose of reality come along. Allyuh keep good an' watchout fuh yuhself an' de damnfool idiot who feelin' so sweet dat dey ent have a care in de world.

 

 
BACKCHAT:  Issue 045

Hotlanta calling! May the best party win...or hopefully de best one won!

Wha wrong wid de Switzerland writer cussin at you with all dat Damit and ting? Wha u do he or she? But guess wat? Dey so rite! Ah still kinda ole school, but ah does pay most everyting online an even transfer funds among meh very many (but low balance) accounts...u know, borrowin from Peter to pay Paul!! Ah sure we go have a lot to say next week!
//Trini in Atlanta