Well yuh know de fete over and is back to fete we start. All de politrickians put away dey lyrics fuh a nex five years, because yuh dun know dat Patos mek dat early election mistake only once and he ent doing dat again.

We gorn back to de fete because is band launching, parang, christmas and carnival all wrap into one again. And yuh know dat all dem Ca;ypso Tents go be bawling again dat how is a short season. Dem is like all dem gas station owner who ent mekking no money but not one ah dem looking to close down and cut dey losses.

Dem Kaiso boys also mus be breathing a little easy now because Patos and he boys get back, because it really woulda have nutten to sing on if Dooks and de staring band had ah win. Ah mean to say is not like it had any cocoa drying wid dat setta fellas, all ah dem was so green is like it was a band at pomsetay. But doh frighten, de CoP show we dat people could vote for a third party, perhaps not enough ah dem but one day, one day, congo-tay.

Anyway all dem PNM run up to Boynsie place in Sally Bay and tek a little rest and relaxtion before dey start de nex 5 years of hard wuk. I doh gih dem rong. After all is dem fellas who have to endure all dem trips and conference, and cocktail party. All de time dey skinning and grinning and want to mek speechification knowing dat it ent have a single man-jack dat beleive a word dey saying.

And yuh know dat det starting jes how de last set finish. De new PR man fuh de Government already want to play like is he money dat spending. He ent telling we how much money Boynsie get pay fuh de retreat. Is not like I want de money, but I ent see how dat is a big secret. Is tax payer money dat spen, it have to have a cheque write somewhere, and de Auditor-General have to see it in time.

So doh frighten, is jes 5 more years of de last 5 years and dat was 5 years of de last 45, except fuh a year or two here and dere when we wasn't too sure what we was doing.

De ting to frighten now is what changes we expecting. I ent mean nutten like eef Patos go be President. Dat is small dasheen. Is de rush to 2020 and how de 2020 world does operate. I ent sure we ready fuh dat.

All dem big country does be moving to a system where when yuh use sumtin yuh pay fuh it yuhself. It ent have no government to pay fuh yuh no more. So while we already feeling dat de light bill gorn up, and yuh know TSTT only waiting to raise phone bill, is like it have more to come.

All dem ad dat we does see on de cable TV fuh all kinda cheap cellphone and telephone doh tell yuh de whole story. De numbers on de screen is jes fuh de service. Den dey adding ah setta service charge and taxes and like magic a 99 dullahs does turn into $150 - dat is what we have to look forward to.

We go see it wid gasoline, and birth paper. De price of food gorn up, and nex dey go want to tell you to pay fuh de plastic bag. In fact even de plastic bag go corst more because nex ting is yuh paying fuh de cart to tek de garbage away.

2020 go be a real expensive year oui foot!

 

BACKCHAT: Issue 046: Vol 8

Dear Tantie,

I voted for the COP in the last election and I would happily vote for the party for the local elections coming up. I think it was an important lesson to be learnt that the UNC base did not move, nor did the PNM base, but that there are so many thousands who want to see good governance in our country. We all need to keep working to bring about that change, or else we would be able to look at our children in their eyes when they become young adults and look around to ask us, why we did nothing to change the mess that our society is in.
//Trinidad & Tobago



Dear Tants and Trini in Atlanta backchatter, The last line in my feedback was in german and means 'have fun with it' Damit is not a curse word but means only 'with it'
//Switzerland