|
Well I ent know
jes how else to describe it, but is like mih fingers an' brain did
have 'laryngitis' is so hard it was to start dis Talk! It was never
easy tryin' to come up wid someting different each an' every week,
but it does worse as yuh get 'younger'...an' allyuh self ent helpin'
yuh Tants wid de deafenin' silence I does be gettin' sometimes.
So de earth did quake an' Trini was frighten no tail, but as is
usually de case we long overs dat...earthquake? Nuttin' could be
further from we mind as de gearin' up fuh fete start. De way Trini
'fraid hurricane more than earthquake yuh would swear is really
Dominica or St. Lucia we livin. What we doh realise is dat if we did
really get a 7 in T&T it wouldn' have much left standin' alomg de
Eastern Main Rd. De day a macco big earthquake hit we, de fault line
dat runnin' along de bottom of de Northern Range go take out plenty
buildings from Carenage to Grande, an' everybody go want to know how
it happen.
De amount of illegal an' unsafe buildings dat yuh seein' all over
dis place (an' not only de squatters in de hills) is a wonder dey
ent come crashin' dong every time it rain an' a lil breeze blow. But
we want to have high speed train too...is who goin' to maintain de
tracks? Is how many Police, an' all kinda Gov't department vehicles
yuh see gettin' auction off mainly because dey didn' get proper
maintenance? Is how come private people could buy a bus from PTSC
an' able to have it roadworthy?
I jes hopin' dat when de 'new' Parliament start de go actually try
to see about de nation's business instead of maccoin' each other's
business. We seriously need dem to pass de breathalyser legislation
especially wid dis short Carnival season...is straight from
Christmas to Ash Wednesday dat people go be drivin' under de
influence, but until we have legislation in place to stop dem even
openin' dey car door de carnage go continue.
When yuh realise dat road fatalities ent all dat far behind de
murder toll, yuh know tings ent good. Shape up people, leave yuh car
home an' take taxi or have a designated driver when yuh want to lime
hearty...even if yuh 'know' yuh could handle yuhself, yuh jes doh
know what de nex driver capable of.
|
|
|
