|
Hear nah, we real
have to talk yes! Is like dis week it full ah Trini man in de news.
Now I does love all we boy and dem when dey does be dey sweetman
self, but is like every now and den sumtin does jump up in dey brain
and want to make dem feel dat dey is some kinda sagaboy dat ent have
to care about nobody else on de planet.
Allyuh know exactly what I mean, de number ah outside ooman and
chirren it have running around dis Trinidad and Tobago we go have to
invent a new kinda Census category someday.
But is where dem man get all dey foolishness genes? Dem Sociologists
does want to say dat how de Caribbean is a Matriarchal society, but
dat is only by way of practical necessity. Is when dem man do dey
ting and buss it, ooman did have to pick up de slack or is bodoh we
in, in trute!
I really cyar believe de tings dat I hearing big, hard back, grown
up man saying in trute yes.
De Good Book say dat de first go be last and so on, so we go start
wid de last one dat real get mih so hot ah had was to go and tek a
lie down yes.
I doh really pay no attention to de golf an dem. Dat is ah game for
dem big sawatee Doctor and Banker, dem who does have money and like
walking around in de hot sun when normal people does be ressing off
on a Sunday after de lunch wash down wid ah nice glass ah Mauby. But
when I hear dat my Boy Stepehn Ames was playing like he could
finally win de ting, well I tun de TV to watch de ting. I doh really
understand all de ting about de scoring wid booger and easel, but I
realise dat he was mashing up de place.
Doh mind dat he have he little Canadian flag, dat doh mean nutten.
De boy born right here and is here he grow up, so he is one ah we.
De sad part is dat all ah we great people always have to leave
Trinidad and Tobago to make dey mark. Sometimes dey does come back
and some foolishness politrickian does make all kinda pappyshow ah
dem, but dat is all we does seem to understand.
Anyway leh we get dis straight from de start. I glad de boy finally
win a ting. Is long time now he knocking on de door and only
poopsing after de fuss round. But it have a way to win a ting and it
have a way to lose a ting. I sure dat he Grandmuddah box him in he
ears plenty time when he was rude to de ironer or ent say Good
Morning when he come in she house.
So is when I hear how he mamaguy Tiger Woods and get he tail cut I
say he would ah learn sumtin, but after he win dis Players
Championship, is like he feel dat he is a Playa. I did watch he
press conference and I was embarrass to say dat he come from South.
South people does know how to behave, and dey doh sit down in front
ah de World and want to get orn like dey head bigger dan dey
jimboots. Is what he go say when he go back to being jes a nex
player on de Tour? Yuh doh behave so, yuh does have to show some
humility and accept tings wid grace. But is so de yute does be I
suppose.
Of course de next one who I does jes have to shake mih head and
laugh is de ole Bas heself. And is ah nex South boy again yes. I
really ent care no longer eef he tief money or not. De last one who
stand up and say dat 'all ah we tief' did sum it all up for all ah
dem politrickians. I ent know what kinda points de PNM trying to
score, but de NAR did waste 3 years chasing Tesoro dullahs and
wasting time when dey could ah be working on de country. What does
come around....
But is when Bas stand up in court and say Frankomen dat he ent know
nutten about no Bank Account because he is a good Hindu man and he
does give all de money to Oma. Lord put ah Hand.
If dat was de case all dem rumshop woulda buss long ago! But is a
nex one who want to say dat is he woman fault dat he tun out de way
he reach. So what he really trying to say is dat eef Hindu wives
didn't look out fuh dey self, is dem to ketch when it have bills to
pay.
As ah say ah keeping de fuss for lass. My boy Patos. Doh mind all de
ting about how he want de Red House, and how he want Coat of Arms on
he car, and he huffing de park in St. Anns, but is when he want to
watch we in face and say dat how he protecting all ah we by bussing
it to Cuba fuh he Heart I have to laugh.
Like he ent realise dat de protection we did want was for he to stay
in Cuba?
|
|
|
