|
Well, well,
well, so dey lockup de ole Bas and trow away de key! Dey mus be
having a fine time down at de Revival Tent at Balisier House
tonight.
Ah mean to say is so much dat poor people could tek, and we ent all
beh-beh. When Bas want to tell we dat he ent know nutten about de
money, and dat how he is just a good Hindu husband dat does give all
de money to Oma is den dat I feel people realise he wasn't escaping
dis one. And is not like he ent get away yet. Dat boy too long in de
politricks to find he self cat-spraddle so. I ent go be surprise if
de ole Bas out by nex week and de case ent go hear for a nex 20
years.
Dat is the real problem, because mih neighbours feeling de same way.
It doh really matter how much time dey lock up Bas and de boys, it
ent changing de price ah salfish eider in de parlour or on de
corner.
Is not like we ent have all dis before anyway. Is jes dis is de fust
time dat it reach so far. Long years it had Johnny O, and Bunny, and
all de ressa dem dat had all kinda cocoa in de sun, but it did
always slide until de nex nine-day wonder reach. Allyuh notice how
de cellphone price ting done talk already? So Digicel reach, it ent
make no difference. We jes getting cellphone cheap from de phone
company instead ah buying dem cheap from de man who ent paying no
duties and tax.
So dey lockup Bas and tek way de dullahs in London, but it still
have a murder everyday, and it still have bad road, and it still
have garbage in de streets. We ent change nutten, and we ent trying
to change.
All dem PNM who dancing like is carnival when de verdict hand down,
ent realise dat ketching Bas ent go result in de Nation changing.
When people in de rumshop does say 'Ah boy, ent ah did tell yuh dat
he guilty!" and den jump in dey car wid dey head full ah grog to
drive home, we ent change.
When Akiel Chambers and all de ressa dem chirren ent get no Justice,
we ent change.
When yuh driving home from de beach and de car in front have bout
turteen yute who all tight and not one ah dem wearing ah seat belt,
we ent change.
When yuh have tings like a National Referendum on Crime and de
Government want to say dat 100,000 sigantures ent mean nutten, we
ent change.
When oil is $72 Yankee dullahs ah barrell and we still talking about
Health Service problems dat we was talking about since 1956, we ent
change.
When we schools have to make parents pay money so dey could buy
toilet paper fuh de school, we ent change.
When we still ent have water in de pipe to bade after all dem long
years we ent change.
When we stilll have to look fuh we pardner in Customs, or Licensing,
or Passport Office, or Red House, or Inland Revenue, or Mount Hope,
to fix we up, we ent change.
De sad part is dat de story reach around de world. De same people
who did want to find out about de Soca Warriors now looking to see
about dis case. And de result is dat dem all seeing jes how backward
we is. When yuh read de news reports around de world about Bas, dey
ent saying dat Bas get ketch. Dey saying dat de whole ting is a
pappyshow. Dey lockup Bas, and it still have Eric and Smiley ting to
start.
But is who hands clean? Even de fellas dat supporting Bas have all
kinda case for corruption in dey name too. So is like we jes
providing more material for Naipaul to mamaguy we again.
As for all dem boy who get charge for de Airport ting, well I ent
know who getting lockup nex, but is only one word of advice dat
Patos and Portia go be telling de region....DoPray!
|
