Yuh know it does be real funny watching how people does watch we back.
Ah mean we does spend dullahs like it ent have no end on all kinda promotion to bigup we self in furrin and den it does fall flat on we face when some Yankee want to arks eef we does be part of Jamaica. Nuff respect to we bredren.

So yuh has to arks where we does be going rong when all round de world everybody does seem to know where Barbados and Jamaica is but dey never hear about Trinidad and Tobago.

Ah was telling mih neighbour jes dat when she did tell me dat she did get some email from she nephew showing she jes what de res ah de world does see about we. He tell she dat over in Car-nar-dar dem people does use a ting call Mapquest to get map and direction and travel information when dey going somewhere in furrin. Well eef yuh lookup fuh Trinidad and Tobago yuh does end up at dis website http://www.mapquest.com/atlas/main.adp?region=trinidad and eef yuh look down to de bottom of de page where it have all de country information it have some alarming statistics on display.

Now I ent know eef someone jes playing de fool or eef dem MBA fellas have too much book brain for me, but when I see how dey projecting dat we population go lorse by about foh hundred Tousan in forty years well I get scare in trute. Ah mean dat is de whole ah TSTT cellphone business dat jes ups and gone. And is not like Dey gone to Digicel or Laqtel. Is gone dey gorn!

Like I say it might jes be a misprint and dey go fix it up as dey go along. I did actually go wid mih farse self and send dem a likkle email aksing what dey feel dey doing, but I ent get no reply yet. Of course I ent expecting we Minister of Tourism to do any such ting heself, is not like he really to boddered wid actual wuk.

So leh we get back to why de ting still scare me. It have nuff reason for it to be a realistic figure and like we ent realising it. So far we had 400 murder last year and we heading fuh 500 dis year. We reach de stage where people go have to make advance bookings for funeral now fuss dem fellas busy. So when yuh add up all dem who dead, and multiply dat by dey tree wife and fourteen chirren dat bussing it to Grenada and America to be safe dat is a easy 5 or 10 Tousand who leffing we.

Once dat start to be de norm allyuh go start to see fewer ah dem rich people chirren going to school in de morning, dat is when yuh realise dat dey shipping dey chirren out. Yuh know dem pickney nah coming back, no matter how much Denyse beg. It jes have too much to keep dem away.
All de Carnival and food and friends does be up dey most ah de time anyhow, so wha dey digging?

However de real ting to consider where 400,000 people could jes disappear is AIDS/HIV. We still making pappyshow about did ting yes.
Look it have some Doctor in Central who doing some kinda ratchifee and it ent have nutten dat de Medical Board could do because it have procedure. Well is de same ting we doing in we society. Man running down all kinda 'ooman because he feel dat eef he breed plenty pickney he have rank.

Dem same ooman ent telling de man jes which chile is he own because dey want de dullahs dat he hiding from he nex wife and so de story does go round. But now in dis time is not jes mauavis langue in de Barracks Yard, dis time is AIDS in dey tail, and it ent have nobody who going and help out dis time. So when dat same man want to feel he could run from de ting by only picking up young girl, like he ent know she done pass by de maxi-man, de boy in de schoolyard, and is double licks dey all getting.

Is a vicious cycle in trute. And it ent have no way we slowing it dong wid all we raise yuh hand lifestyle. Dem yutes ent learning no better ways because dey ent feel it have a better way.

So when dem fellas at mapquest put up dey figures it might be a mistake, but is a mistake we should take serious, serious, serious!